నల్లని చేపలు

 

నేత్ర సముద్రంలో నల్లటి చేపలు

కబుర్లాడుతూ అగాధాలు వెదుకుతూ

గిరగిరా తిరుగుతుంటాయ

కెమేరాకందని జీవితం

కాగితాలకందని అనుభవం

తళుకు బెళుకులతో

కవ్వీంచి కధలు చెప్పే కాటుక చేపలు

దాచుకునే వన్నీ

అద్భుత చిత్రాలు

వెతికే కోద్దీ

కనుల సముద్రం అంతుచిక్కని

"డిస్కవరీ చానల్"

అట్ట అడుగున ఆకుపచ్చని పర్వతాలు

శిలతో చెక్కిన శిల్పాలు

ఏళ్ళుగా కూరుకుపోయిన గతాలు

అగ్నిపర్వతాలు,బాల్యపు రంగురంగుల గాజులు

అప్పుడప్పుడు-

ఋతుపవనాలు సందడిలో

కరిగిన మబ్బులు ముత్యాల గుంపులై

నేలకు జారే వానజల్లులా జారిపడతాయి

నల్లని చేపలు నీటి తడిలో

విలవిలలాడుతాయి

కరిగిపొతున్న కలలు

కలల మధ్యలొ దాచుకొన్న గతం

నీటి తడిలో ఒదిగిన ఓదార్పు-

గుండె బరువు దిగగానే

అలజడి ఆగిన నేత్ర సముద్రంలో

నల్లని చేపలు మేరుపులు అద్దుకొని

కలలుకంటూ ఈదుతూనే వుంటాయి