ముఖ పుస్తకాన్ని తెరిచి
వెలుగు తలుపు మీద
ఆడే ఆటని చూడగలగాలి
గోడల మీద రాతలు రాస్తూ
అక్కడే వుంటూ ఎవరికి వారే
గొప్పగా మౌనంగా మిగిలి పోవడం చూడాలి
నవ్వే చిరునవ్వులో నవ్వులేకపోవడం చూడాలి
బయట మాటలో లోపలి మాటలో
దట్టంగా అల్లుకున్న నాచు కదలడం
నాచులో పూలు పూయించి
రమ్మని ఆహ్వానించే ఆటని చూడాలి
విరిగిపడే పెళ్లలుగా కొందరు
పిట్టల్లా ఎగిరే కొందరు
నాటకాన్ని ప్రదర్శించే కొందరు
గోడలనిండా రాతలు రాస్తూ వేళ్ళు దాచుకోవడం చూడాలి
ముఖాలకి పొద్దున్న రాత్రి తేడా లేదు
నిత్యం వెలిగే బల్బు కింద ఎగిరే పురుగులు
రెక్కలు చూపించిబెదిరించడం చూడాలి
కోపం వస్తే ద్వారాలు మూసి
ముఖాలని దాచుకుని రహస్యంగా
గోడలమిద రంగు నీళ్ళు జల్లడం చూడాలి
విసుగు ముఖాలు చూపిస్తూ
తిట్టుకుంటూ రాతలు పులిమి
వేళ్ళ ముద్రలు గోడలమీద వుంచి
గొప్పలు పోయే ఆటగాళ్ళని చూడాలి
ఈ కిటికీ ఎన్ని సార్లు తెరిచి మూసి చూసినా
చదివే కంటికి అక్షరాల కబాడీ ఆట కనిపిస్తూనే వుంటుంది
